سهراب خان سرڪي، ڊاڪٽر

سهراب خان سرڪي، ڊاڪٽر: ناميارو سياستدان ۽ پ.پ اڳواڻ ڊاڪٽر سهراب خان ولد سردار واحد بخش خان سرڪي، 30 جولاءِ 1968ع تي ڳوٺ ڳڙهي حسن، تعلقي ٺُل، ضلعي جيڪب آباد ۾ پيدا ٿيو. هن ماڊرن هاءِ اسڪول سکر مان مئٽرڪ ۽ گورنمينٽ ڪاليج ٺل مان انٽر پاس ڪئي. ان بعد پوليٽيڪل سائنس ۾ ايم. اي جي ڊگري شاهه عبداللطيف يونيورسٽي، خيرپور ميرس مان ورتائين، جنهن بعد ڊائو ميڊيڪل ڪاليج ڪراچيءَ مان ايم. بي. بي. ايس پاس ڪيائين، ان کانپوءِ هن عملي سياست ۾ حصو ورتو ۽ ابتدا کان وٺي پاڪستان پيپلز پارٽيءَ سان وابسته رهيو آهي.
ڊاڪٽر سهراب سرڪي پهريون ڀيرو 1993ع ۾ آزاد اميدوار طور صوبائي چونڊن ۾ بيٺو ۽ مير حسن خان کوسي کي شڪست ڏئي صوبائي اسيمبليءَ جو ميمبر چونڊيو ۽ پوءِ پاڪستان پيپلز پارٽيءَ ۾ شموليت اختيار ڪيائين. سهراب سرڪي 1997ع جي صوبائي چونڊن ۾ به ڪامياب ٿيو ۽ 2002ع جي صوبائي چونڊن ۾ به ڪامياب ٿيو ۽ پ.پ.پ (پيٽرياٽ) جو ميمبر رهيو، ان دوران بين الصوبائي رابطن جو صوبائي وزير رهيو. سهراب سرڪي 2013ع وارين چونڊن ۾ پي. ايس 15 جيڪب آباد/ ڪشمور تڪ تان ڪاميابي حاصل ڪئي.
ڊاڪٽر سهراب سرڪي سماجي ڪمن ۾ به اڳڀرو رهيو آهي. هن پنهنجي علائقي ۾ ڪاليجن ۽ اسڪولن جي قيام لاءِ عملي ڪوششون ڪيون آهن. مختلف وقتن تي سعودي عرب، فرانس، سنگاپور، شام، دبئي ۽ انگلنڊ جا دورا پڻ ڪري چڪو آهي.

داخلا ۾ استعمال ٿيل تاريخون

1968.07.30  عيسوي

ناميارو سياستدان ۽ پ.پ اڳواڻ ڊاڪٽر سهراب خان ولد سردار واحد بخش خان سرڪي، 30 جولاءِ 1968ع تي ڳوٺ ڳڙهي حسن، تعلقي ٺُل، ضلعي جيڪب آباد ۾ پيدا ٿيو.

شخصيتون - ڀاڱي جون ٻِيون داخلائون